Sambhajiraje Reaction On Chhaava Movie Controversy Chhatrapati Sambhaji Maharaj Lezim Dance

छावा चित्रपटाच्या ट्रेलरमध्ये संभाजी महाराज तसंय महाराणी येसूबाई हे दोघेही लेझीम नृत्य करताना दिसत आहेत. शिवप्रेमींना ही गोष्ट खटकली असून काही संघटनांनी याला विरोध केला आहे. या सिनेमाला आता मोठा विरोध होताना दिसतोय. पुण्यातल्या मराठा क्रांती मोर्चा या संघटनेकडून या चित्रपटाला विरोध केला आहे. छावा चित्रपट महाराष्ट्रात कुठंही प्रदर्शित होऊ देणार नाही, असा इशारा मराठा क्रांती मोर्चा पुणे शहराचे समन्वयक सचिन आडेकर यांनी दिला आहे.

दरम्यान, या वादावर आता छत्रपती संभाजीराजे यांची प्रतिक्रिया समोर आली आहे.

काय म्हटलंय छत्रपती संभाजीराजेंनी?
लक्ष्मण उतेकर यांची पूर्ण टीम मला मुंबईत भेटली होती. त्यांनी मला ही क्लिक दाखवली . त्यावेळी त्यांना मी म्हटलं होतं की, पूर्ण चित्रपट आम्हाला दाखवा. पण त्यांच्याकडून आम्हाला अद्याप बोलवण्यात आलं नाहीये, त्यामुळं आम्ही अजून त्यांना हिरवा कंदिल देऊ शकत नाही.
ट्रेलरमध्ये पाहायला मिळतंय की, छत्रपती संभाजी महाराज लेझीम खेळतायत, डान्सच्या स्वरुपात खेळतायत… तर लेझीम हा आपला सांस्कृतिक ठेवा आहे. लेझीम खेळणं काही चुकीचं नाहीये. ते गाण्याच्या स्वरुपात आपला आंनदउत्सव साजरा करत असताना दाखवणं सिनेमॅटिक लिबर्टी कितपत योग्य आहे, योग्य नाही? यावर चर्चा होणं गरजेचं आहे. इतिहासकारांनी, ज्यांचा याच्यावर अभ्यास आहे, त्यांनी एकत्र चर्चा करायला हवी. पण लेझीम खेळणं हे काही चुकीचं नाहीये, हे मी स्पष्ट करतो, कोणत्या सीनला घेतलंय हे माहिती नाहीये…असं संभाजीराजे यांनी म्हटलंय.

छत्रपती संभाजी महाराज यांच्या जीवनावर चित्रपट तयार करणारे दिग्दर्शक उत्तेकर मराठी आहेत. १००-२०० कोटी खर्च करण्याचं धाडस करून संभाजी महाराजांवर चित्रपट बनवला आहे.त्यामुळं यामध्ये कुठल्याही चुका राहू नयेत अशीच आमची ही इच्छा आहे, असंही त्यांनी स्पष्ट केलं.