مسك الختام

[rss]

مسك الختام

السلام عليكم ورحمة الله وبركاته

.


.​

خل عنك الملامه ماذخرت الكلام
.. .. .. بح صوتي عليك ومات منَّك كثير ​

صادق الود واحساسي بذاك الغرام
.. .. .. يوم اناديك لكن كان مالك ضمير ​

كنت اشوفك بعيني غير كل الانام
.. .. .. كنت لي في حياتي نبض روح ونظير ​

قبل ماقدرك اللي كان فوق الغمام
.. .. .. من سبب طعنة يْدينك لظهر الكبير ​

ينمحي من عيوني والليالي كرام
.. .. .. دارت ودار معها حد سيف ٍ شطير ​

ريِّح دموع عينك لاجل عينك تنام
.. .. .. والله اني بذاك الوقت ماشفت خير ​

جفت الصحف واليوم المشاعر حشام
.. .. .. هذا انا بالف خير وجعل دربك سفير ​

واحد ٍ مثل حالي يصغرن العظام
.. .. .. في عيونه ولايحسب ال لفحة هجير ​

شارب ٍ وانت تدري قبل ذيك السهام
.. .. .. عزة النفس ماني من زماني كسير ​

جيت عالي مقام ورحت عالي مقام
.. .. .. حافظ ٍ قدر نفسي مثل قدر العشير ​

حافظ ٍ لك ثلاثه والثلاثه حرام
.. .. .. باقيه بي وانا ماني بنفاخ كير ​

الوفا والعهود الماضيه والملام
.. .. .. لويجيني جحيمه جاك ردي عبير ​

والا انا قلتها بعدك على مايرام
.. .. .. والفضاء مايضيق ولي جناحين طير



للشاعر: نجم العبدالله ​